كەشە ياعني 26- ماۋسىم كۇنى كەشتە اۆتونوميالى رايوندىق دەنە- تاربيە كىلوبىندا <شينجياڭدى انىممەن جىرلايمىن> اتىنداعى بۇكىل مەمىلەكەتتىك جۇلدەگەر اندەردى سيلاۋعا ارنالعان كولەمدى كونسەرتتىك كەشى بولىپ ءوتتى. ورتالىق حالىق راديو ستانسياسى، جۇڭگو مۋزيكانتتار قوعامى، شينجياڭ ۇيعۇر اۆتونوميالى رايوندىق پارتكوم ۇگىت ءبولىمىنىڭ بىرلەسىپ ۇيىمداستىرۋىندا وتكەن بۇل كەش اسا دابىرالى ءوتتى. كونسەرت كەشىندە داۋلاڭ، ەركىن، ابدوللا، دالەلقان ادىلبەك ۇلى قاتارلى بۇكىل مەمىلەكەتكە تانىمال ايگىلى انشىلەر، جانە باسقادا ەل ىشىندەگى اتاقتى انشىلەر وسى رەتكى باعالاپ- سيلاۋداعى سيلىق العان اندەردى شىرقادى. وسى كەزەكتى سيلىققا قاتىناسقان 700دەن استام ءاننىڭ ىشىنەن بۇكىل مەملەكەت بويىنشا نەشە كەزەكتى باعالاپ، سارالاۋ ارقىلى 20 ءان قارا ءۇزىپ العا شىقتى. سونىڭ ىشىندە دالەلقان ادىلبەك ۇلىنىڭ ورىنداۋىنداعى ريزابەك قاسەن ۇلىنىڭ سوزىنە جازىلعان قادىل احمەت ۇلىنىڭ ءانى < اق شاشۋ > باس جۇلدەنىپ جەڭىپ الىپ، بۇكىل مەملەكەتتىڭ ءبىرىنشى دارەجەلى سيىلقتى ەنشىلەدى. باسقا ون توعىز ءان 2-، 3- ورىنعا تابان تىرەدى. ەستەرىڭىزگە سالا كەتسەك < اق شاشۋ > ءانى ساۋىردە رايونىمىزداعى باعالاۋ مايدانىندا شيىنجياڭ بويىنشا قارا ءۇزىپ العا شىعىپ، مەمىلەكەتتىك سيلىققا جولداما العان بولاتىن. وسى رەتكى سارالاۋعا ىلىنگەن اندەردىڭ ىشىندەگى جالعىز قازاق ءانى بولعان < اق شاشۋ > سيلىقتىڭ ەڭ جوعارى تورىنەن ورىن الىپ، قازاق ۇلتىنىڭ اتىن اسپانعا شىعاردى. بۇكىل مەملەكەتتەگى تالايلاعان تالانتتى، اتاقتى كومپوزيتورلاردىڭ ءۇمىتتى اندەرىن شاڭىندا قالتىرعان < اق شاشۋ > ءانىنىڭ اۆتورى بولعان قادىل احمەت ۇلى اعامىز قازاق تالانتىنىڭ تاستى جارىپ، تەرەڭگە تامىرلانعان دەڭگەيىن شىن مانىندە تانىتا ءبىلدى، ءاندى شىرقاۋ شىڭىنا شىعارىپ ورىنداعان دالەلقان ادىلبەك ۇلى اعامىز دا < اق شاشۋ > ءانىنىڭ باس جۇلدەگە ىلىنۋىنە وراسان ۇلەسىن ارنادى. اسىرەسە ول كىسنىڭ كەشەگى دابىرالى كەشتە ناعىز قازاقي ۇلگىدەگى ۇلتتىق كيىم كيىنىپ، ءاننىڭ سىرگە جيار ساتىندا كورەرمەنگە شاشۋ شاشىپ، قازاق داستۇرىنە جۇگىنە ءبىلۋىنىڭ ءوزى ۇلتىمىزدىڭ مەرەيىنە مەرەي ۇستەگەندەي كەرەمەت ءبىر جاراسىمدىلىقتى قالىپتاستىردى. انە ءسۇيتىپ، ءبىز < اق شاشۋ > ءانى ارقىلى كۇللى جۇڭحۋاعا تاعى دا ءبىر ماقتانىشىمىزدى ءبىلدىرىپ قالدىق. يلايىم < اق شاشۋ > انىندەي ۇلتتىڭ ماقتانىشىنا اينالاتىن اندەر مولىنان جازىلا بەرسىن، قادىل اعامىزداي قازاقتىڭ تالانتتى سازگەرلەرىنىڭ قاتارى كوبەيسىن، دالەلقان اعامىزداي ۇلتىمىزدىڭ شوقتىقتى انشىلەرى ونەر اسپانىنان كوبىرەك كورىنە بەرگەي ... اللاھ وسىنداي ءسۇيىنشىلى ساتتەرىمىز كوبەيتە بەرسىن !!!

جاڭا اۋەن تورابىنىڭ حابارى
حاباردى جازعان: مەرەي تۇرداقىن ۇلى