4 -ءساۋىر قازاق بوكسىنىڭ قاھارمانى بەگزات ساتتارحانوۆتىڭ تۋعان كۇنى . ءبىراق بۇل كۇندە تىلەك ايتىلىپ، كوڭىل تاسىماعالى تۋرا توعىز جىل بولدى . سيدنەيدە قازاق جۇدىرىعىنىڭ قۇدىرەتىن تانىتقان جاس تالانت جيىرما جاسىندا توزبايتىن اتاقتى جەڭىپ الىپ، سول جاسىندا ماڭگىلىككە ساپار شەككەن . سودان بەرى الىستاعى افينى مەن ىرگەمىزدەگى  بەيجىڭدە ەكى وليمپيادانىڭ الاۋى جانىپ، ەل جالاۋى بىرنەشە رەت بيىكتەن كورىندى . الايدا رينگتە اتوي سالىپ، الاش اتىن الىسقا جىبەرگەن بەكزاتتىڭ ورنى بارىنەن دە بولەك ەدى .

 

بەگزات چەمپيون بولاتىن كۇن ءالى كۇنگە كوز الدىمدا . تىكەلەي يەفيردى جۇرگىزگەن كوممەنتاتور امانگەلدى سەيىتحانوۆتىڭ: «بەگزات ساتتارحانوۆ – وليمپيادا چەمپيونى! جيىرما جاسار جىگىت الىپ بەردى تالاي جىل ۇمتىلعان بيىكتىكتى!» –  دەگەن جالىندى سوزدەرى دە جادىمنان وشپەپتى . كوك تۋدى جامىلىپ، رينگتى اينالا جۇگىرگەن ونىڭ قيمىلىنا سۇيسىنبەگەن جان قالماي، جۇرەكتەردە وتانعا دەگەن ىستىق سەزىم قايناپ تۇرعان-دى . . . ءبىراق بۇل قۋانىشتىڭ عۇمىرى تىم قىسقا بولاتىنىن ءبىز بىلمەدىك . جاڭا، 2001 -جىلعا ساناۋلى مينۋتتار قالعاندا بارشا قازاق بەكزاتىنان ايىرىلدى . عاسىردا ءبىرتۋار اسىلىن جوعالتتى .
اسقاق ارمان مەن بيىك رۋحتى باستى قارۋ ەتكەن قايسار بەگزات تىرى بولسا، بۇگىندە 29 جاسقا تولار ەدى . ەگەر جەر باسىپ جۇرسە، ءوزى ارمانداعان ءۇش وليمپياداعا قاتىسىپ، جەڭىمپاز اتانار ما ەدى؟! ارتىنان ەرگەن ىنىلەرىنە جولباسشى بولار ما ەدى؟! وتاندى سۇيۋدىڭ، ەل ءۇشىن سىنعا ءتۇسۋدىڭ سالماعى اۋىر ەكەنىن، سەنىم ۇدەسىنەن شىعىپ، جانكۇيەر كوڭىلىن تابۋدىڭ بوكسشى ءۇشىن ەڭ باستى باقىت سانالاتىنىن جاستار ساناسىنا سىڭىرەر مە ەدى؟! اتتەڭ، كۇللى الەمنىڭ «سەن تۇر، مەن اتايىندارى» جينالعان وليمپيالىق ويىندار – شەبەرلىك پەن تاجىريبەنىڭ عانا ەمەس، ەلدىك پەن نامىستىڭ دا مايدانعا تۇسەر شاعى ەكەنىن، ول مايداندا ۇلتتىق رۋحى ءبيىكتەردىڭ ۇشپاقتان كورىنەتىنىنىڭ ايقىن دالەلى بولعان بەكزاتتىڭ ماڭدايىنا ازعانتاي عانا عۇمىر جازىلىپتى .
جيىرماسىندا جارق ەتىپ، قايتا  ءسونگەن جۇلدىزدىڭ جالىنى مىڭداعان جاستىڭ جۇرەگىنە وت سالدى . ماڭگى جاس قالپىندا قالعان بەكزات بەينەسى بارشا قازاقتىڭ كوڭىل ءتورىنەن ورىن الدى، ءومىرى تىم كەلتە بولعانمەن، ارتىندا ءوشپەس ىز قالدى . ول ىز قازاق بوكسشىلارىن قاشاندا العا جەتەلەيتىن داڭعىل جول ىسپەتتى .
وليمپيادا چەمپيونىن ماڭگى ەستە قالدىرۋ ءۇشىن كوپتەگەن شارالاردىڭ جاسالعانى راس . بەكزات ساتتارحانوۆ اتىنداعى بوكس­شىلار تۋرنيرى باستاۋ الدى، سپورت سارايىنا باتىر ۇلدىڭ ەسىمى بەرىلدى . رەسپۋبليكا سارايىندا ەسكە الۋعا ارنالعان ۇلكەن كەش ءوتىپ، ءوزى تۋىپ-وسكەن وڭتۇستىك ءوڭىر مەن قازاقستاننىڭ تۇكپىر-تۇكپىرىندە بەكزاتتىڭ رۋحىنا ارنالعان ءتۇرلى باسقوسۋلار بولدى . ءبىراق سوڭعى جىلدارى سيدنەي رينگىندە جۇلدىزى جانعان بوكسشىعا ارنالعان ەل كولەمىندەگى ىس-شارالاردىڭ قارا­سى ازايىپ بارادى . تۋعان كۇنى دە ءوز دەڭگەيىندە اتالىپ وتپەدى، اسىرەسە، 25 جىلدىعىن ەسكەرۋءسىز قالدىردىق . تەلەارنالاردان بەكزات جونىندەگى دەرەكتى فيلمدەر كوپ كورسەتىلمەيدى، تەك «حابار» ارناسى تۇسىرگەن تۋىندى وسىدان ءۇش-ءتورت جىل بۇرىن كورەرمەندى قاھارمان ۇلىمەن قايتا قاۋىشتىرعان . راس، بەكزاتتىڭ ماڭگىلىككە اتتانعانىنا ءبىراز جىل بولدى . ءبىراق ول «كوزدەن كەتكەسىن، كوڭىلدەن دە جوعالاتىن» جان ەمەس قوي! بەكزات ساتتارحانوۆتاي تاريح پاراعىنا سىڭگەن داڭقتى بوكسشىنى ەل ەشقاشان ۇمىتپاۋى كەرەك .
كەيىنگى جىلدارى 57 كيلوگرام سالماق دارەجەسىندەگى بوكسشىلارىمىز جۇلدە اۋىلىنان الىس قالىپ، قازاق جانكۇيەرىنىڭ كوڭىلىنە قاياۋ ءتۇسىرىپ جۇر . سونداي ساتتەردە كۇللى قازاق بەكزاتىن ساعىنادى . اقتىق سىندا اۋىستىرىپ كيەتىن فورماسى دا بولماي، ەرماحان اعاسىنىڭ جەيدەسىن باقىلاۋشىلاردان جاسىرىپ كيگەن بەكزاتتان وڭباي تاياق جەگەن ريكاردو حۋارەس – قازىرگى تاڭدا كاىسپقوي بوكستىڭ مايتالمانى . ال قىسقا دا بولسا ءماندى عۇمىرىمەن ەل جۇرەگىندە ماڭگى ءومىر سۇرەر بەكزات – تەك ساعىنىش قانا .
تۋعان كۇنىڭدە سىي جاساپ، تىلەك ارناۋ باقىتى بۇيىرماعان حالقىڭ رۋحىڭا قۇران باعىشتاپ، دۇعا وقۋدى جادىنان ەش شىعارمايدى . سەن ماڭگى جۇرەكتەسىڭ، باتىر بەكزات!